Færslur

Sjálfboðavinna Kosta Ríka

Fór til Kosta Ríka í sjálfboðavinnu og var í námi

Sóldís Alda Óskarsdóttir fór til Kosta Ríka í sjálfboðavinnu vorið 2016. Sóldís hefur mikinn áhuga á ferðalögum og hefur ferðast mikið. Hún hafði samband við okkur stuttu fyrir jól í fyrra og var komin út í febrúar á þessu ári. Sóldís fór út í 6 vikur, var í 4 vikur í sjálfboðavinnu og ferðaðist í 2 vikur. Sóldís var í námi og fór út á miðri önn. Hún segir það vel geranlegt, krefjist einungis skipulags og ef til vill ekki skyldumætingar í tíma ;). Eins og margir sjálfboðaliðar nefna eftir heimkomu, segir Sóldís ferðina of stutta og hvetur aðra að fara í lengri tíma.

Soldis_CR

Fannst tíminn líða of hratt

Ég valdi AUS vegna þess að margir mæltu með samtökunum. Einnig fannst mér AUS vera með meira spennandi verkefni heldur en önnur samtök. AUS reyndist mér ótrúlega vel, allt var vel skipulagt bæði hér heima og hjá samstarfssamtökum þeirra úti í Kosta Ríka.
Ég valdi ICYE Steps, sem eru verkefni í styttri tíma utan Evrópu. Ég vildi fara í verkefni utan Evrópu var einfaldlega sú að ég hef ferðast mjög mikið innan Evrópu og vildi prófa eitthvað nýtt. Ég valdi Steps frekar en Long-Term því ég var í háskólanámi þegar ég fór út. Ég fór út á miðri önn og var í sex vikur. Það er vel hægt ef maður skipuleggur sig mjög vel og algjörlega þess virði. Þegar ég var komin út hafði ég engan áhuga á að fara heim og þessar sex vikur liðu alltof hratt. Ég myndi frekar mæla með lengri tíma verkefnum ef fólk hefur tök á því. Ég mæli líka algjörlega með styttri tíma verkefnunum þar sem maður upplifir ótrúlega mikið á þessum tíma og lendir í nýjum ævintýrum á hverjum einasta degi (mjög mikil klisja en það er í alvöru þannig).

Kosta Ríka algjör paradís

Ég valdi að fara til Kosta Ríka og get hiklaust mælt með því landi. Ég vildi fara til spænskumælandi lands og var alltaf aðallega að horfa á Mið-Ameríku. Ég hafði heyrt mjög góða hluti um Kosta Ríka og eftir að hafa kynnt mér landið og skoðað myndir þaðan var ég ákveðin í að fara þangað. Kosta Ríka er algjör paradís, endalaust af pálmatrjám og strendur með hvítum sandi og tærum sjó.
Ég valdi verkefni sem heitir Obras del Espiritu Santo og var þar að vinna á leikskóla í San José. Ég valdi það af því að mig langaði að vinna með krökkum og fannst þetta verkefni þess vegna spennandi. Verkefnið kom mér mjög mikið á óvart, það var bæði krefjandi og skemmtilegt, og samstarfsfólkið var frábært.

Soldis_CR

Allt annar heimur

Þegar ég kom út af flugvellinum tók á móti mér alveg annar heimur, mjög heitt og svona milljón manns fyrir utan flugvöllinn með allskonar skilti og enn fleiri öskrandi leigubílstjórar að bjóða manni far. Ég fann þó fljótlega manninn frá ACI (samtökunum hérna úti) sem var að sækja mig og hann skutlaði mér til host fjölskyldunnar. Daginn eftir fór ég á kynningu hjá ACI, þar sem ég fékk kynningu á verkefninu, landinu og menningunni, ásamt alls konar praktískum upplýsingum. Seinni hluti dagsins fór svo í að skoða miðbæinn og fá mér mjög langþráð Starbucks. Næsta dag byrjaði ég svo í verkefninu og þá fór ég svoldið að komast í rútínu.

Bjó hjá fósturfjölskyldu

Ég bjó hjá fjölskyldu og upplifunin mín þar var frábær. Ég virðist alltaf ætla að vera jafn heppin með host fjölskyldur/meðleigjendur/herbergisfélaga sama hvert í heiminum mér dettur í hug að fara. Ég heyrði reyndar ekki um neinn sjálfboðaliða sem var ósáttur við host fjölskylduna sína þannig að þetta var líklega engin heppni 🙂 Host mamma mín var mjög nice og vildi allt fyrir mig gera. Hún átti fjögur börn sem bjuggu heima, þó þau voru á aldrinum 26-36 ára, en það er eðlilegt í Kosta Ríka. Mér fannst helsti kosturinn við að búa hjá fjölskyldu vera sá að maður kynnist landinu og menningunni miklu betur. Þá sér maður hvernig fólkið býr, sem mér finnst ótrúlega spennandi, og í raun eitt af því sem mér finnst áhugaverðast við að ferðast.

Soldis_CR

Undirbjó sig vel fyrir brottför

Ég var ekki smeyk við margt áður en ég fór út. Ég var búin að lesa mikið af bloggum hjá fólki sem hafði verið í Kosta Ríka og þau töluðu öll mjög vel um landið. Það sem ég var þó helst smeyk við var að landið væri ekki mjög öruggt og að mér myndi e.t.v. líða óöruggri í tíma og ótíma. Það var þó alls ekki þannig, ég upplifði mig aldrei óörugga, hvorki í Kosta Ríka, né í Panama eða Nicaragua. Kosta Ríka búar eru mjög indælir og alltaf tilbúnir að hjálpa manni ef maður villist eða eitthvað svoleiðis. Ég var mjög dugleg að villast fyrstu dagana (kannski óþarflega dugleg) og þá var aldrei neitt mál að stoppa einhvern og spyrja til vegar. Oft fylgdu þeir manni þangað sem maður var að fara í staðinn fyrir að benda bara eða útskýra hvert maður ætti að labba.

Trúin mikilvæg Kosta Ríka-búum

Það að upplifa menningarmismuninn fannst mér áhugavert og líka mjög eftirminnilegt svona þegar upp er staðið. Fyrsta menningarsjokkið kom strax fyrsta daginn. Þá fór ég með host mömmu minni til vinkonu hennar, þar var einhverskonar saumaklúbbur og við sátum úti á veröndinni. Ég fór aðeins fram og þegar ég kem til baka er komið kaffi á borðið. Þau voru öll voða einbeitt að fara með mjög langa borðbæn eins og ekkert væri sjálfsagðara.

Helsta menningarsjokkið sem ég upplifði var samt tengt því að Kosta Ríka búar eru miklu trúaðri en Íslendingar. Þegar maður spyr fólk t.d. „¿cómo estás?“ sem þýðir hvernig hefurðu það, þá fær maður mjög oft svarið „bien, gracias a dios“ sem þýðir ég hef það gott, þökk sé guði. Rétt áður en ég fór til Íslands ætlaði ég svo að sækja dót til host fjölskyldunnar minnar. Dótið hafði ég fengið að geyma hjá þeim á meðan ég ferðaðist um Nicaragua og Panama. Ég vissi að host mamma var í ferðalagi svo ég sendi henni skilaboð og spurði hvenær hún kæmi heim, og fékk svarið „á morgun, ef guð leyfir“. Ég vissi svona ekki alveg hvernig ég átti að skilja þetta og hvort ég þyrfti að hafa einhverjar áhyggjur að því að hún kæmi þá ekki heim. Hún kom heim daginn eftir og ég sótti dótið svo þetta var ekkert mál. Almennt virtist mjög margt vera guði að þakka eða að einhverju leyti háð guði.

Soldis_CR

Hrísgrjón og baunir í öll mál

Í kvöldmat voru svo oftast hrísgrjón og baunir (en ekki hvað). Með því var oft kjúklingur, ofsteiktir bananar eða framandi grænmeti. Eitt kvöld fékk ég alveg extra skrítinn kvöldmat sem samanstóð af spaghettíi, kartöflumús og hrísgrjónum. Fyrst hélt ég að það ætti kannski bara eftir að koma með eitthvað kjöt, sem gæti þá mögulega útskýrt tilvist kartöflumúsarinnar. En nei það var ekkert kjöt, bara spaghettí, kartöflumús og hrísgrjón. Ég vissi ekki alveg hvað af þessu ég átti að borða saman, spaghettí og hrísgrón? Kartöflumús og hrísgrjón? Neiii passar ekki alveg.

Þið getið svo lesið meira um ferðina á soldistravels.weebly.com 🙂

Meira um sjálfboðastörf í Kosta Ríka á vegum AUS má finna hér: Kosta Ríka

aus.is, sund í Mexíkó

TOPP 6 áfangastaðir 2016

KOSTA RÍKA

Pura Vida! – Þetta er lífið
Kosta Ríka er land á milli Karabíska- og Kyrrahafsins, skógi vaxið með fallegum ströndum, fossum og gígvötnum. Ticos, eins og Kosta Ríka-búar kalla sig eru einkar vinaleg og afslöppuð þjóð. Það væri heldur magnað að skella sér í ár til landsins, læra spænsku og vinna göfuga vinnu. Verkefni í Kosta Ríka eru flest til lengri tíma; 6-12 mánuðir.

Kosta Ríka, aus.is

NÝJA SJÁLAND

KIA ORA! Svona heilsa Ný-sjálendingar.
Nýja Sjáland er heillandi eyland í Eyjaálfu þar sem kvikmyndirnar um Hringadróttinsögu voru teknar upp. Landið samanstendur af 2 eyjum, en á báðum eyjum má meðal annars finna eldfjöll og jökla, en magnað og fjölbreytt landslag minnir suma ef til vill stundum á Ísland. Landið er líka paradís fyrir spennufíkla, teygjustökk, fallhlífastökk eða hvað sem þér dettur í hug. Verkefnin eru öll frekar fjölbreytt en í boði eru lengri tíma verkefni, 6 eða 12 mánuðir.

Nýja Sjáland, aus.is

NEPAL

Nepal er lítið land í Asíu, með landamæri að mestu til Indlands en einnig til Tíbet í Kína. Landið er að mestu fjallendi. Nepalir fylgja flestir annaðhvort Hindúatrú eða Búddatrú, en báðum trúarbrögðum fylgja áhugverðar hátíðir sem eru fyrirferðamiklar í landinu. Nepal er rosalega vinsæll áfangastaður hjá sjálfboðaliðunum okkar núna. Kvikmyndin Everest eftir Balta er nýkomin út og jarðskjálftinn í Nepal í vor kallaði eftir þörf sjálfboðaliða. 8 af 10 stærstu fjöllum í heimi er í Nepal svo landslagið er magnað. Okkar vinsælasta verkefni er munaðarleysingjahælið Horac en mörg önnur verkefni eru í boði bæði í lengri tíma og styttri.

Nepal, aus.is

TANSANÍA

Tansanía er ótrúlega heillandi land í Austur Afríku. Kilimanjaro, hæsta fjall Afríku og eitt af tindunum 7 (the seven summits) er að finna í Tansaníu. Fyrir utan strendur Tansaníu má svo finna eyjuna Zanzibar, með hvítar strendur og tæran sjó. Í norðurvesturhluta landsins liggur stærsti hluti Viktoríuvatns, stærsta vatns Afríku. Landslag Tansaníu er því gríðarlega fjölbreytt og spennandi og margt að skoða. Um að gera að skella sér í sjálfboðaliðastarfi og skoða landið í leiðinni.

Tansanía, aus.is

MEXÍKÓ

Saga landsins er heillandi en fyrr á tímum bjuggu fjölbreyttir þjóðernishópar í landinu, þeir þekktustu í dag er líklega Maya-fólkið og Aztec-fólkið. Stærsta hátíð landsins er hin árlegi Dagur hinna dauðu, eða Día de los muertes. Mexíkó er stórt land sem liggur að Bandaríkjunum, Kyrra- og Karabískahafinu, Guatemala og Belís. Burrito, Tequila og Casa Fiesta í bland við ævifornar rústir og strendur hljómar eins og ótrúleg blanda. Sjálfboðaliðastörf í boði eru fjölbreytt, allt frá að vinna með börnum í hverskyns verkefnum, í að vinna með heimilislausum hundum sem og vinna við listir og menningu.

Mexíkó, aus.is

KENÍA

Fjölbreytt landslag einkennir Kenía, eyðimerkur í norðaustri, fjallendi með djúpum dölum teygir sig yfir miðju og vesturhluta landsins en í suðurhlutanum má finna graslendi sem nær að ströndum við Indlandshaf. Fjölbreytt og mikið dýralíf er að finna í landinu en dýrin fá stórt landssvæði útaf fyrir sig. Kiswahili er móðurmál landsins en enska er kennd og notuð við kennslu í skólum. Verkefni eru í boði bæði í lengri og styttri tíma og eru verkefnin fjölbreytt en mörg eru við kennslu eða vinna með börnum á annan hátt.

Kenía, aus.is

aus.is, kosta ríka

Kosta Ríka

Kosta Ríka er eitt 7 landa í Mið-Ameríku, og er staðsett milli Nicaragua og Panama.
Landslag Kosta  Ríka er mjög fjölbreytt þrátt fyrir stærð þess, hvítar sólarstrendur, regnskógar, eldfjöll og fossar. Landið er staðsett við miðbaug og er þar einungis talað um tvær árstíðir: regntíð og þurrkar. Regntímabilið stendur yfir frá apríl til um miðjan nóvember. Eins og nafnið gefur til kynna er mikil úrkoma á þessum tíma og getur hitastigið farið niðrí 13°, sem hljómar ekki svo slæmt fyrir okkur Íslendinga en vert er að hafa í huga að rakastigið er einnig mjög hátt þannig að komið endilega með peysurnar ykkar.
Þurrtíðin stendur yfir frá nóvember til mars. Á þessum tíma árs er heitt og mikil sólskin, heitast er við ströndina en í höfuðborginni helst hitinn aðeins mildari eða 26°.

Opinbert tungumál landsins er spænska, gjaldmiðillinn nefnist Colones og höfuðborgin er San José.
Íbúarfjöldi landsins er um 5 milljónir og er mikill meirihluti þeirra Kaþólskir.

Hvernig fer ég þangað:
Sjálfboðaliðastörf í Kosta Ríka með AUS eru í boði í gegnum Long term og Steps verkefnin.

  •  Styttri tíma verkefni (Steps) eru í boði frá 2-16 vikna.
  •  Lengri tíma verkefnin eru í boði í 6 eða 12 mánuði og er brottför í janúar og ágúst á ári hverju

Verkefni:

  • Vinna í skólum sem aðstoðamaður kennara
  • Skýli fyrir börn með erfitt heimilislíf
  • Stuðnings stofnun fyrir ungar mæður og börnin þeirra
  • Samtök sem hlúa að yfirgefnum börnum sem hafa orðið fyrir áreitni
  • Skóli fyrir fötluð börn
  • Barna umsjá
  • Barnaspítali
  • Aldraðarheimili
  • Stofnun sem tekur að sér vilt dýr sem hafa verið í haldi ólöglega, markmiðið er endurhæfing fyrir náttúruna
  • Umsjá með sjávardýrum
  • Stofnun sem viðheldur allskonar smádýrum.
  • Umsjá með skjaldbökum í útrýmingarhættu
  • Varðveisla á rauðum og grænum Macaws (páfagaukar)
  • Garðyrkjustörf
  • Umhyrða að stóru skóglendi
  • Verkefni í Þjóðgarði
  • Skýli fyrir heimilislausa
  • Skrifstofa ACI Costa Rica (ICYE)
  • Uppbygging á samfélagi

Nánari upplýsingar um verkefnin má finna hér: www.icye.org en einnig með því að senda tölvupóst á icye@aus.is.
ATH: Sum verkefnanna krefjast einhverrar spænsku-kunnátta. Einnig eru sum verkefnin einungis að leita eftir kvenkyns sjálfboðaliðum, vegna verkefna sem sjálfboðaliðinn þarf að sinna.

Þátttökugjöld:

Long Term – Lengri tíma verkefni:
6 mánuðir: 620.000.- kr.
12 mánuðir: 900.000.- kr.

Steps – styttri tíma verkefni:

Fyrstu 4 vikurnar: 150.000 krónur

Hver vika eftir það: 25.000 krónur

Heimasíða samtakanna í landinu:

Heimasíða ACI samtakanna í Kosta Ríka: http://www.aci.cr/index.php?lang=en

La Marta Wildlife Refuge er mjög vinsælt verkefni þar sem sjálfboðaliðinn hjálpar við að sinna villtum dýrum, hreiðrum þeirra, mata dýrin og huga að enduruppbyggingu dýranna til að sleppa þeim aftur út í náttúruna. Dýrunum hafa verið bjargað úr ýmsum aðstæðum. Sjálfboðaliðinn býr í verkefninu eða hjá fósturfjölskyldu. Verkefnið er einungis til lengri tíma, 6 eða 12 mánuði. Brottför í janúar eða ágúst.

Stefán Þór vann í verkefninu í 6 mánuði fyrri hluta árs 2015 og gerði þetta flotta myndband.

aus.is, Costa Riga, Stefán

La Marta Wildlife Refuge

Stefán Þór vann í La Marta Wildlife Refuge í Kosta Ríka seinasta hálfa árið.
Read more